Ulogujte se

Nigerija: Bombaši "Boko harama" ubili 19 ljudi

Četvoro bombaša samoubica iz grupe "Boko haram" ubila su 19 ljudi u seriji napada na pripadnike civilne zaštite i obične građane u nigerijskoj državi Borno, saopštila je danas policija.

Ovo je bio najsmrtonosniji napad u posljednjih nekoliko mjeseci u sjevernom gradu Majduguriju, gdje je pobuna i počela prije osam godina.

Policijski komesar Demijan Čukvu rekao je da su 23 osobe ranjene u napadima. Među žrtvama je 12 pripadnika civilne zaštite i sedam osoba koje su se okupile poslije njihove pogibije.

Najmanje jedan napadač samoubica bila je mlađa žena. U trenutku napada, pripadnici civilne zaštite bili su na dužnosti.

"Boko haram" sve češće koristi djevojčice i mlađe žene za napade na pijace, kontrolne punktove i slične mete. Mlade žene koje su uspjele da umaknu teroristima ispričale su da su te osobe drogirane i primorane da izvrše samoubilačke misije.

Vlada Nigerije prošle godine je objavila da je grupa "Boko haram" uništena, ali su se smrtonosni napadi nastavili.

Od početka pobune poginulo je više od 20.000 ljudi, hiljade su otete, a nasilje se prelilo u susjedne zemlje.

Ostavite komentar

Unesite sva polja označena sa zvjezdicom (*).